الحلقة الثانية والعشرون

..........................

هيرودوت الوطن العربي

جغرافي ولف بلاد

مولولود ف عراقنا العربي

مدفون ف تراب فسطاط

يوصف ف شعوب ومساكن

تقاليد للناس وأماكن

من كتبه (مروج ومعادن)

(وملوك واهل الديارات)

وصف الزلزال كما هو

والبحر الميت وصفه

طواحين بالريح والقوة

ومافيش اتنين اختلفوا

عن انه بجد كبير

واتعلم منه الغير

وكتب عن خلق كتير

وكتب ف الحمضيات

العالم مين؟

.........

الحلقة الواحدة والعشرين

............................



حدوتة أنوار زاهية

ع الفارس المقدام

فاتح شمال افريقيا

ومثبت الإسلام

ف الصحرا حرب ضروس

فوق اللهيب بيدوس

يكسر جبال ونفوس

ويهد جيش لروان

عزله معاوية ف يوم

ويزيد رجع ولّاه

والفارس المعلوم

عاش فوق حياته حياه

مغربنا يشهد ليه

كان الإيمان ف عنيه

ألفين تحية عليه

دا بنالنا قيروان

الفارس مين

.........

الحلقة العشرين

.....................

عالم من سوريا وله هامته

استاذ ف الطب وله خبرة

والعالم يشهد بعظمته

وف عقله الفكرة تجيب فكرة

ف النحو كتابته تكون كافية

وكمان ف الطب وجغرافيا

وكفاية علينا وبلا قافية

الدورة الدموية الصغرى

سافر على مصر وباركوله

ماهو أصبح شيخ لأطبائها

المرضى كتير واما يجوله

من نظرة عين يعرف دائها

وف بيته صالون للعلم يدوم

ويمد الإيد يدي المحروم

ف صالونه العلما يزيدوا علوم

وف ايده العسرى تكون يسرى

كان عازب ولا واد ولا زوجة

وحياته يا دوب للعلم وبس

وكريم ع الناس المحووجة

ماهو زي شعاع خارج م الشمس

اتوفى وساب بعد وفاته

ف وصية تحدد طلباته

ع المرضى توزع ثرواته

وياريت الناس تاخد عبرة

العالم مين؟

..................

الحلقة التاسعة عشر

.....................

فارس تلت فرسان

استشهدوا ف مؤتة

يدخل صفوف العدو

يبارزله بالستة

كان هو واللي معاه

فرسان جنود الله

دمع النبي يبكيه

نقطة ورا نقطة

عايش ف حضن النبي

حتى النبي اتبناه

نزلت آيات ربنا

تلغي التبنّي لغاه

جاهد مع العدنان

قاد السرايا كمان

كان للإيمان عنوان

ولا شت يوم شتة

دلوقت يا حضرات

سهلة الحكاية كمان

الإسم دا بالذات

شايفينه ف القرآن

لا نروح شمال ويمين

ولا توهة ف الجنبين

نظرة يادوب بالعين

من غير نظر حتى

الفارس مين؟

........................

الحلقة الثامنة عشر

....................



العالم ده إسمه منوّر

من عصر الدولة الحمداني

وعشان ما نلفش وندوّر

ونفكر ف حروف وأسامي

كان له كتابات

فلسفة بالذات

وفراغ للفيزيا

من العلامات

وارسطو ان كان

أستاذ أول

ف العالم ده

مُعلم تاني

العالم مين

..............

الحلقة السابعة عشر

....................

من ضمن سبعة أوائل

دخلوا ف دين إسلام

للحبشة هاجر معاهم

كل اللي هاجروا قوام

ولما عاد ف الميعاد

هاجر الى يثرب

قضّى الشباب ف الجهاد

زوّد إيمانه إيمان

حارب ف كل الحروب

ويّا النبي المختار

ولا همهوش م الموت

ولا عام مع التيار

والكل يشهد بيه

عاقل ذكي ونبيه

ماهو إبن عمة نبي

والنقب كان عوام

ولما مات مقتول

بالغدر م الأوغاد

ف البصرة كان مدفنه

ولكل نفس ميعاد

أسماء بتبكي عليه

لكن حتعمل إيه

دا ميعاد وبيلبيه

أما الحياة أيام

الفارس مين؟

......................

الحلقة السادسة عشر

.......................

من نسل آل البيت

عالم كبير معلوم

ف الطب أو نباتات

أو فلسفة ونجوم

كتب التاريخ والأدب

والشعر من غير سبب

وكتابته ليها العجب

بيها العلوم حتقوم

مولود ف سبته هناك

ف المغرب العربي

وف ( نزهة المشتاق )

الإسم بالعربي

أسس لجغرافيا

رسم الخطوط وافية

وياناس بلا قافية

أستاذ لحد اليوم

جايز خطوط الطول

فيه قبله راسمها

لكن خطوط العرض

هو اللي شكّلها

ف خرايطه ساب علامات

حدد حدود وبلاد

واتعلموا الخواجات

طبعا كده مفهوم

العالم مين؟

.................

الحلقة الخامسة عشر

........................

فارس ف ايده سيفين

والمولى كان مراعيه

السيف بطول مترين

حارب عدانا بيه

ابو بكر قال يا عرب

دا فارسنا عز الطلب

ولا أي جيش يتغلب

ويكون فارسنا فيه

لقبه تميمي البطل

اسمه كمان معلوم

حضر الحروب وانتصر

ع الفرس ثم الروم

ف الشعر ياما قال

صوته يهز جبال

يتباهى بالأبطال

والجيش يرد عليه

ف الزينة يمسك سيف

هرقل زعيم الروم

والدرع من بهرام

من غير عتاب ولا لوم

ماهو دول غنايم الولد

وقت الحروب والجلد

الله عطاله المدد

الخلق تزعل ليه؟!

الفارس مين

..........................

الحلقة الرابعة عشر

........................

صاحب كتاب السنن

وتخصصه التفسير

عالم حديث وتاريخ

لف البوادي كتير

استاذ ل ( سيبويه )

وكتير قوي التلاميذ

فسّر آيات قرآن

تفسير جميل وعزيز

كتب تاريخ الصحابة

واتوصّى بالتفسير

*****

دار الزمان بالكتب

ضاعت .. فضل واحد

لكنه أصبح علم

رغم الكتاب واحد

اسم الكتاب ( السنن )

والباقي من اسمه

تفسيره كان مدرسة

بشهادة ( ابن كثير )

العالم مين؟

.....................

الحلقة الثالثة عشر

.............................

فارس ورامي سهام

ومجابة دعواته

ودخوله ف الاسلام

كان من بداياته

ماهو خال رسول الله

ف رحابه قال يا حياه

كان الاله ويّاه

سدد ف رمياته

*****

ف القادسية امام

قائد لجيش اسلام

ع الفرس كان بركان

منصور بإسم الله

وف معركة صفين

والفتنة ف الصفين

سابهم وعاش للدين

حاضن كتاب الله

وكتير حاجات وحاجات

عاشها البطل بالذات

واما ف ميعاده مات

كان ف البقيع مثواه

الفارس مين؟

.....................

الحلقة الثانية عشر

....................



إسم الأمير.. محمود

فارس من الفرسان

كسر التتار ف جالوت

واتحدى أولاد خان

يا أمة متفرقة

إتجمّعوا في الحال

جيش الأعادي طغى

والنصر يبقى محال

غير لما يوم نتحد

ونعز دين إسلام

من بعد شجر الدر

والفتنة ف المماليك

قعد الأمير ع العرش

صبح الولد سلطان

الأصل من خوارزم

واتباع ف سوق العبيد

بس النهاية النصر

وبغدر يبقى شهيد

لكن كفاية قدر

يحمي الوطن يا زمان

الفين سلام للبطل

الفارس العنوان

الفارس مين

...................

الحلقة الحادية عشر

.......................

عالم ف أصل الكلام

عنه ما نستغنى

حط النقط للحروف

بقى للحروف معنى

من يومها بدأ الكلام

بالصح يتفسر

والنحو أسس له

علشان يمتّعنا

ميّال لآل البيت

وللإمام بالذات

شاف م الأذية كتير

ف البصرة أو بغداد

لكنه عالم جد

ما همهوش من حد

دؤلي دا لقب الجد

فسرتها بعلامات

دلوقتي يا حاضرين

أدينا اهو قاعدين

وانتوا بقى تفكّروا

وتقولوا يطلع مين

العالم مين؟

.....................

الحلقة العاشرة

...................

(لانامت أعين الجبناء )

قالها الفارس قبل مماته

قالها وكان الحق معاه

معذور جدا أصل حياته

حرب ونصر بأمر الله

بعد الخندق أسلم هو

زاد إسلامنا بفارس قوة

والكفار سقطوا في الهوة

والإسلام ربنا علاه

حرر أرض عراقنا وشامنا

قتل الفرس وقتل الروم

قبل الفرس ف حرب الردة

ع النصر الفارس مفطوم

قبل دا كله ف مؤته يصول

رفع الراية بعرض وطول

سمّاه المصطفى مسلول

ع الأعداء ماهو سيف الله

مكة ميلاده وموته ف سوريا

ف تراب حمص الفارس مات

بعد سنين العمر الفانية


حرب ونصر جهاد ف جهاد

هو دا فعلا معنى الفارس

عمره يفوت على دينه الحارس

رفرفي فوق الروح يانوارس

واقروا الفاتحة يا خلق الله

مين الفارس؟

.................

الحلقة التاسعة

.............

مولود ف بخاري وراح خوارزم

واتوفى ف قلب تراب همدان

مشهور في الطب وجغرافيا

وفلك وعلوم الشعر كمان

ورياضة وكيميا مع الفيزيا

وعلوم الكون أشكال والوان

****

عمل القانون ف الطب

ورسالة ف التشريح

وف الطبيعة يحب

يكتب بعقل فصيح

اختلفوا علما الدين

في العالم الشاطر

فيه اللي قال دا عظيم

فيه اللي قال كافر

وما بين أراء لتنين

أهو مات بقاله سنين

وأدينا اهو عايشين

بعلومه نتفاخر

العالم مين

................

الحلقة الثامنة

................



من قبرص لبلاد المغرب

أبو عبد الله فارس للدين

ماهو قائد عادل وبيغلب

كل الأعداء وف غمضة عين

وان كنتوا حتحتاروا ف اسمه

ف الحال اسئلوا اندلسيين

إختار م البربر إبن زياد

على جيشه وبعته لأسبانيا

وفتحها قوام من بعد عناد

ودا عصر الدولة الأموية

إسمه على إسم كليم الله

فارس والموت ف قاموسه حياه

ومدام في سبيل الله يرضاه

ودا حال المؤمن قوي بالدين

الفارس مين؟

....................

الحلقة السابعة

...................



الكيميا أكيد يبقى أبوها

إتعلّم منه الخلق كتير

الصودا الكاوية اكتشفوها

على إيده ما هوّ أبو التحاليل

حمض النتريك هو اكتشفه

والهيدروكلوريك بإيديه عمله

والكبريتيك برضه بفضله

طب فاضل إيه يابو عقل خطير؟

من فين مش فارقة لكن موته

ف الكوفة وبعد سنين إنجاز

ماهو جابر فعلا وعمايله

بتقول كان هو صحيح أستاذ

والإختراعات خد ما تعدش

القلويات كات على إيده

ونشادر والميّة الفضة

وبوتاس ودهب ميّة يجيده

علّمنا وعلّم ناس تانيين

ماهو فخر عروبة وفخر الدين

وياريتنا نخلّف ناس تانيين

ونعيد أمجاد عصر الإعجاز

العالم مين؟

الحلقة السادسة

.................

من بعد الخندق مع خالد

أعلن إسلامه ف يوم واحد

من مكة وراحوا مدينة النور

علشان توحيده اله واحد

من بعد الكفر سنين وسنين

والجهل وعيشة الجاهليين

بظهور الحق صريح ومبين

أسلم وصبح فعلا قائد

بعد اليرموك حرر غزة

عمواس ونابلس رفح يافا

وعمر قال عنه دا أرطبون

وف عقله شجاعة وحصافة


وف مصر ياعيني بجد عليه

يفتحها وإسم الله حواليه

وفتح للدنيا بجد إيديه

فتحتله الإيد بالطول والعرض

من مكة لكنه ف أرض النيل

إتوفى وكان عاشق للأرض

الفارس مين؟

...............

الحلقة الخامسة

.....................

عملاق في الطب مافيش زيّه

والحاوي كتاب جدا مشهور

أبو إيه..؟ مش فاكرة لكن عارفة

عالم معروف كده زي النور

راح اسهل وأقول على نصه

أبو بكر لكن إيه الباقي؟

في تاريخنا الحُر قوام بصّوا

وهقدم ليكم أشواقي

مولود في ايران

واتوفى كمان

لكن عربي ودينه الإسلام

عاش حبة هناك

في تراب بغداد

ولكنه عاد

تاني على إيران

فكروا بجنون أو بالراحة

فزورة بسيطة ومرتاحة

وكفاية عليّا أقول عمل ايه


أول من جاب خيط لجراحة

العالم مين؟

..............

الحلقة الرابعة

............




قائد جيوش موسى بن نصير




فى المغرب العربي بحاله




والبحر عدّاه زي الطير




أسبانيا كلها وقفاله




لكن عشان قائد بصحيح




والمسلمين ويّاه تسابيح




إحتلهم أسرع م الريح




فارس حقيقي هنيّاله




جبل على البحر بإسمه




فاز في الحروب علشان حازمه




أصل الإيمان جواه حاسمه




والأندلس راكعة قباله




ياهل ترى مين الفارس




اللي احنا بنقول أحواله؟




...............................

الحلقة الثالثة

................

من تونس الخضرا

يا أخوة يا حاضرين

كان الميلاد لكن

من أهل يمنيين

عالم ولف بلاد

في الإجتماع بالذات

واتعلموا الخواجات

من علمه مجتمعين

ألّف كتب ياما

و( مقدمة ) أشهر

عالم وعلامة

بيه العرب تفخر

في الشعر كان له باع

وتاريخنا والأتباع

وحروفه بالإجماع

للإجتماع عناوين

كان الميلاد تونس

لكن وفاته ف مصر

إتوفى والمدفن

كان عند باب النصر

إسمه العلم معلوم

من يومه لما اليوم

ولبكرة والمفهوم

خالد من الخالدين

العالم مين

.......................

الحلقة الثانية

.....................

في الحبشة خطيب

وعماد للدين

و ف مؤتة شهيد

من غير دراعين

كان شاب لكنه كريم جواد

في الحبشة بعلمه يصد عناد

ويلف بدينه بلاد وبلاد

سموه الناس( أبو المساكين )

في الحرب يكون تاني القواد

دا قرار من عند رسول الله

كان بينه وبين الجنة ميعاد

أستشهد زيد وهو وراه

ف يمينه الراية اللي رافعها

قطعوله يمينه ما ودعها

بشماله فضل برضه رافعها

قطعوله شماله يا حول الله

الراية غرسها في صدره إيمان

قتلوه وبقالنا علم وأدان

رب السموات بالرحمة كمان

ركبله بدال الإيد جناحين

الفارس مين؟

................

الحلقة الأولى


..................


عالم ف طبيعة ورياضيات


كان نابغة ف علم البصريات



فلسفة هندسة والطب كمان


ودا غير نظرية عن العدسات


في البصرة ميلاده وكان مشهور


بيحارب جهل الناس بالنور


كان كل كتاب يكتبه بنّور


وياعيني ف شرح العين بالذات


كان عصر الدولة الفاطمية


سافر على مصر ف سرية


بقى زي النيل بالخير يدّي


من كل علوم الكون علامات


زي الفيضان ولا عمروش جف


على كل علوم العالم لف


وف تسعة وتلاتين بعد الألف


النسر الطاير حط ومات


العالم مين؟


.........................

فوازير رمضان

......................

ورجعنا بشوق تاني يارمضان

نحكي الحكايات عن أهل زمان

ونقول عن عُلما كتير راحوا

وفاتولنا علوم أشكال والوان

ونصوّر أبطال ومعارك

والكل يجاوب ويشارك

مطلوب نتعرّف ع العالم

أو إسم الفارس م الفرسان

ومعانا جوايز بالقناطير

معلومة تكون بعد التفكير

أو ضحكة تغطّي على التكشير

ونسلّي صيامنا نهار رمضان

ورجعنا بشوق

..........................

المقدمة

.............

اهو عاد رمضان مع فوازيرنا

علما وفرسان دول تفكيرنا

معلومة سؤال عن شخصيات

مش حلق حوش ولا تعلب فات

واهي فايدة تعم على الاخوات

ونفكر ونسلي صيامنا

.......................