الحلقة التاسعة والعشرون

...................................



رابع سلطان من آل عثمان

معجون بإيمان عادل فالح

وحّد أناضول فتح البوسنة

لبلاد المورة كمان كاسح

حتى البغدان ومغول قرمان

وجزر ليونان راح لها سابح

حب العلماء جمع الأدباء

كرّم شعراء تكريم ناجح

العدل ف إيد والقوة ف إيد

أما الفتوحات على إيده تزيد

الخلق معاه كده بالتحديد

زوّدوا على اسمه كمان فاتح

الفارس مين؟

....................

الحلقة الثامنة والعشرين

...........................

رمل وحجارة كمان

صنع القزاز يا زمان

والكيميا كات لعبته

عالم عظيم الشان

من رندة كان مولده

وف قرطبه مشهده

كل العرب يشهدوا

على انه كان فنان

ف الشعر كان له إيد

والطب كان له باع

عالم بجد فريد

للعين وللاسماع

علم الفلك كان ليه

والفيزيا تجري عليه

لم العلوم ف ايديه

علشان نقول دا كان

ساعة مائية اخترع

والات تراقب نجوم

لكن بديعة البدع

فاكرينها لما اليوم

انه عمل جناحين

بالريش على الجنبين

كده بالصلاه ع الزين

اول ما قال طيران

العالم مين؟

.................

الحلقة السابعة والعشرين

...............................



كان أرض النور أصل جدوده

وأبوه علشان التار سابها

وف يثرب إتجوز أمه

مكتوبله يدوق شهد ترابها

واما الإسلام أصبح ظاهر

ورسول الله قال حنهاجر

الخير جواه كان الحاضر

أسلم من قبل ما يدخلها

كان مؤمن جدا بالمكتوب

وإيمانه وصبره كمان خلوه

ف الغزوة أبوه مقتول مضروب

ويسامح إيد قتلتله أبوه

كان كله إيمان وأمان خلاه

بقى حافظ سر رسول الله

ويشوف كل الغزوات وياه

ماهو كل مناه جنة يطولها

الفارس مين؟

...............

الحلقة السادسة والعشرين

.........................

من أرض المحروسة ميلاده

تحديد ف بحيرة دمنهور

كمّل ف دسوق باقي حياته

وبعلمه بيمد جسور

ثانوية وسافر لما ريا

كمّل تعليم الكلية

ودراسته ف علوم الكيميا

إتخرّج واهو عدى السور

أمريكا وراح أكبر جامعة

إتعلم بقى اسم وسمعة

إتخرج ودي أول شمعة

بقى فعلا فعلا دكتور

الضوء والليزر والفيمتو

أنا قولت وسهّلت حقيقته

وزيادة عليهم ماهي سيرته

معروفه وللناس مشهور

ونقول من تاني عليه ونزيد

يستاهل والله نقول ونعيد

واهي نوبل شاهدة عليه تحديد

تسعة وتسعين خرجت للنور

العالم مين؟

...............

الحلقة الخامسة والعشرين

.........................

مكتوب الدمع على الأبطال

مكتوب الجرح على فلسطين

يتحالفوا جيوش كل الأندال

على أرض الأقصى يا صليبيين

مكتوب الموت على كل جبان

على كل رجيم منهم وشيطان

وان ضاع الحق ف أي زمان

حتما هيعود مع ناس تانيين

الوطن العربي ترابه ولود

تبدرله الشوك يطرح فرسان

ويكون مع أهل الحق ورود

على أهل الشر يصير بركان

مابقاش في قاموسنا خلاص الخوف

فرسان مرصوصة هناك ف صفوف

وتراب الأرض دروع وسيوف

ورايات ف إيدين أبطال حطين

الفارس مين؟

.................................

الحلقة الرابعة والعشرين

...........................



صاحب كتاب النغم

صاحب كتاب العين

وله تلامذة علم

مرصوصة ع الصفين

عُمان تشوف مولده

وف العراق مشهده

ف البصرة لو حددوا

معروف وللملايين

*****

وف يوم وفاة ام الرشيد

ف البصرة كان ميت كمان

والموت ماهوش أبدا بعيد

عن أي واحد مهما كان

لكنه أبد الدهر

يفضل علامة وفخر

صاحب عروض الشعر

قولوا يا وزّانين

العالم مين؟

..................

الحلقة الثالثة والعشرون

........................

من قلب الصحرا وقلب النار

الأسد الحر خرج يا زمان

صدره العريان قال يا استعمار

مش هرضى لوطني بأي هوان

من ليبيا الحرة أسد حالف

يتحدى جيوش ويموت واقف

والكل بيتفرج شايف

ف الصحرا أسد ضد الطليان

عشرين سنة حرب شمال ويمين

ولا هم بطلنا نذير ووعيد

مع انه خلاص فوق السبعين

إنما بيهد جبال بالإيد

إتكاتروا عليه طوابير طوابير

مكتوب وخلاص حُكم المقادير

الأسد الحر يطب أسير

ونهايته شهيد بقرار إعدام

الفارس مين؟

..................