كل عام وانتم بخير

( أغنية النهاية)

( أغنية النهاية)

..............

حواديتنا اهى وصلت للتوتة

وبقينا ف اخر الحدوتة

باى باى رمضان

شهر الإحسان

والعيد أهو بان

بنبونى وكعكة وبسكوتة

كل عام والجميع بخير ويارب فوازيرى تكون عجبتكوا

ويارب نتقابل فى رمضان الجاى على خير

تحياتى

منى الغزاوى

30

الفزورة الثلاثين واهداءخاص
من شاعر قدير
إيه رأيكم لو روحنا بعيد

لفراشة من أرض الأقصى

م القدس جاية بحلم جديد

تدينا فى التفانين حصة

فصين عينيها الفيروزتين

واللولى فى سنان ع الصفين

ياسمينة أجمل م الياسمين

فى جمالها نكتب ميت قصة

لو كان بأيدى ارسم صورة

م القدس لمّا المنصورة

وأجيبها تحكى الفزورة

وانصب لها ألف منصة

فى الشعر ملكة بقلب رحيم

وأميرة على فن التصاميم

والإسم بادى بحرف الميم

ولا عمره ع الفكر استعصى

عارفينها دى مين

29

بننادى بإسم بطلنا أكيد

وف عصره وطننا العربى فى عيد

بيحج ف عام ويحارب عام

ولحد الأن مالى الحواديت

وليالى الألف تقول يا عباد

دا خليفة ف قلب قصور بغداد

أمجاد يا عرب .. يا عرب أمجاد

لو عاد حيعود من تانى العيد

لسحابة تعدّى يقول.. عدّى

وفى أى مكان شإتى.. حطى

خيرك حيصب أكيد عندى

وصلت فتوحاته ونصره بعيد

قال والحواديت جايبة غناوى

بيقولوا ويحكوا عليه حكاوى

وجوارى كأن الواد غاوى

مع إنه خليفة وعقله رشيد

طب يطلع مين؟

28

وحلفت تحرر أرض الدين

من أى إيدين طاغيين ظالمين

والمولى بنصره حماك وراعاك

تشهد على كده أرض فلسطين

الدين لله داشعارك كان

دقى يا أجراس أذن يا أذان

بإيمانك بتصد العدوان

مهما ح يتّحدوا الصليبيين

أصبحنا خلاص حبة أقذام

ولا فيش فى زمانّا زعيم وإمام

دلوقتى حياتنا كلام فى كلام

نترحّم على أيام حطين

الفارس مين؟

27

قلب الولد لما رأها

طب ف عيونها العسلية

ساب أرضه نام تحت سماها

وقال بحبك يا ما ريّا

عروسة والطرحة زتونى

جابهالها عاشق مقدونى

مع إن أصلها فرعونى

والزفة إسكندرانية

وقف الولد على شطها قال

ف عينيها ميت مليون موال

لفة ملاية مع الخلخال

خلى الولد طب ف ثانية

دى إسكندرية يا محلاها

يا جمال شطوطها وسماها

قولولى مين اللى بناها

خلاها أحلى ما فى الدنيا؟

26

خارجين من ست سنين عاجفين

من يونيو سنة سبعة وستين

وإيمانّا بإن النصر مبين

خبّط على باب سينا ف رمضان

من بعد صلاة الظهر صقور

طايرين فى السما بتلف تدور

يا عدو عليك دلوقتى الدور

ترفع لنا راية الإستسلام

بقرار لزعيم مصر المغوار

الجيش بيعدى خطوط النار

بارليف إسطورة الإستعمار

فى ساعات ينهار تحت الأقدام

من بعد النصر الريّس قال

الحق رجع على كف رجال

غنيلنا يا نيل وارقصى يا قنال

دلوقت نمد الإيد بسلام

طب يطلع مين؟

25

كات ملكة بجد وعقل تمام

وف قلب سبأ للعرش مقام

لكن هُدهدنا فصيح بصحيح

جاب الأخبار للنبى سليمان

إداله كتاب قاله يودّيه

من عنده وبسم الله كات فيه

وبسرعة الهدهد راح لهناك

بكتاب سليمان تفهم معانيه

من بعد ما جمعت كل الناس

شاورتهم جد وبالإخلاص

قالت راح أروحله بلاده واشوف

ويبانلى هناك للصورة أساس

سليمان وجنوده على الصفين

علماء من جن وبنى أدمين

بيقول عرشها قدامى يكون

والعرش اتحط فى غمضة عين

إتغيّر شكل العرش قوام

لكن علشان العقل تمام

تفهم من بعد سؤال وجواب

وتمد الإيد تعلن إسلام

الملكة دى مين؟

24

الوش الجامد والقرنين

علامات للكفرة التتاريين

يحرقوا فى بلاد.. يقتلوا فى عباد

من سور بغداد لما فلسطين

جنكيز وهولاكو وغيره كتير

نازلين تكسير نازلين تدمير

ولا رحمة تحوش ولا أى ضمير

والرعب يحاوط ف الملايين

وبطلنا قطز والمولى معاه

جهّز فى جيوش مؤمنة بالله

أهلا بالموت وابعدى يا حياه

يا نموت يا نعيش رافعين الدين

وف (عين جالوت ) قطز المغوار

وجنوده بيتحدّوا الأخطار

ولا قامت قومة لأى تتار

من يومها لغاية يوم الدين

وسؤالنا اللى بنسألكوا عليه

من غير جرى إيه أو فين أو ليه

الإسم الأصلى لقطز إيه

ورّونا بقى اللى يجاوب مين؟؟

23

من كام سنة وانت يا مصر النيل

محكومة بإيد أغراب عنك

ولحد ما جه زمن التحرير

والحاكم بقى فعلا إبنك

من بعد الحكم الملكى ما غار

بايدين أبطال ثوار أحرار

بصدور عريانة ف خط النار

يتحدّوا الموت علشان خاطرك

من قبل زماننا كمان بزمان

مُحتلة بإيد هكسوس ورومان

فرس ومماليك على أل عثمان

مليون عدوان ولا يوم هزّك

ولغاية يوم تلاتة وعشرين

من يوليواتنين بس وخمسين

يا جماله مع الأحرار واقفين

حالفين ليعيدوا زمان عزّك

وعشان الفقرا من الملايين

بيأمم ويعيد التقسيم

فعلا وبمعنى الكلمة زعيم

مرسوم على وشه جزور أرضك

طب يطلع مين؟

22

استاذ لكليم الله موسى

من علم الرب عطاله كتير

على شاطئ مصر المحروسة

كان أحلى ميعاد للنور والخير

بيعيب فى سفينة عشان تعليم

وبيقتل طفل عشان تعليم

وجدار يبنيه علشان تعليم

العلم دا بحر خطير وكبير

وكليم الله ما صبرش عليه

مع كل حكاية بيسأل فيه

لو يصبر حبة حيحصل إيه

كنّا اتعلمنا كتير وكتير

الصبر على المقادير حكمة

والعبد الصالح قال كلمة

دا فراق وما فيش بعديه لمّة

واستنى أقولك ع التفسير

العبد ده مين؟

21

علشان عيون البنت

يا عنترة إضرب

واقطع رقابى العدا

إياك فى يوم تهرب

واكتب لها الاشعار

فوق خد كل جدار

تلقى الرمال أنهار

ولطعم بحر الغرام

عطشانة وبتشرب

طلبوا الجمال الحمر

من أرض للنعمان

أرض الهلاك يا ولد

بس الغرام سلطان

واحدك تروح للخطر

ويقابلك الأهوال

تصمد قصاد القدر

تعبر سهول وجبال

وتروح لمهر الحبيب

مش فارقة حتروح فين

وبقيت يا عاشق مثل

فى الحب للعاشقين

للشوق بقيت عنوان

يا فارس الفرسان

بس السؤال الأن

البنت... تطلع مين؟

20

ايه رأيكوا فى حبة رياضة

نروح بقى للعب الكورة

أما البطل يبقى يا سادة

حريف وفعلا أسطورة

بلد البطل تبقى البرازيل

والإسم يبدأ حرف الباء

أسمر ودمه عسل وجميل

ملك صحيح.. لعب وأخلاق

عملوه وزير لشباب بلده

وفى كل حفلة يكون موجود

الدنيا كلها بتحبه

مشهور وعدى بلاد وحدود

بقى قدوة للناشئين بالذات

ودا رغم فيه ألوفات بعده

بس اللى فعلا زى الواد

قليل وع الإيد يتعدوا

طب يطلع مين؟

19

أطهر نساء الكون

صانها الكريم ربهم

شافوا الوليد ع الإيد

سبّوها من جهلهم

سكتت وبصت ليه

ودموعها فى عينيها

شاورت بإيدها عليه

ينطق.. ينجّيها

قالوا. نكلم مين؟!

لازم نقيم الحد

ربك بفضله رحيم

نطق الوليد فى المهد

قال.. إنى عبد الله

وكتابى فى يمينى

وامى.. بأمر الله

ح نحطها فى عينى

الكفر لما يزيد

يملا القلوب بالغدر

أخدت ضناها بعيد

هاجرت وراحت مصر

أم المسيح يا خلق

تمشى الطريق وحدها!

بإيديها حاضنة الحق

ومعاها نور ربها

الطاهرة تطلع مين؟

18

ميت ألف أه يا وطنّا وأه

ما عادش فيه أبطال جايين

من بعد ما الجزار جبناه

شنق زعيم أرض الرافدين

يحمى اليهود ويقول إرهاب

على كل واحد قال إسلام

وبقينا جنبه ف عصر الغاب

حبة قرود وفراخ ونعام

حتى الفراخ ما بقيتش تبيض

عشان ما فيش ولا ديك يدن

ويزورنا نرقع بالزغاريت

ولا نفتكرش التار أبدا

ونقولوا م الغرب التجديد

واهى عولمة على شيكا بيكا

واما الرجال فى زمانّا تحيض

سلام كبير على أمريكا

إبنك دا صاحب فكر عظيم

لا شافعى ولا حتى حنيفة

يا خوفى يطلع بكره زعيم

يقول هاتوه يبقى خليفة

الجزار مين؟

17

نروح بقى لفن السيما

ونشوف بطل فى الفن فظيع

أعمال كتيرة وعظيمة

من عنترة العبسى لابو ربيع

ونقول كمان جعلوه مجرم

يسرق ويقتل بالخسة

مع إنه طيب ويبيّن

كده الرصيف نمرة خمسة

ده غير حاجات مالية المسرح

وحاجات كتير فى التليفزيون

ح تشوفها عقلك راح يسرح

وتقول حقيقى الفن جنون

ودا عبقرى ومليان تفانين

أعمال كتيرة بيتحسّوا

وعشان كده كل الفاهمين

قالوا عليه ملك الترسوا

طب يطلع مين؟

16

من قصر الشوق لبين القصرين

حرافيشه بتلعب فى الحارة

وولاد الحارة على الصفين

زغروتة وطبلة وزمارة

من قلب زقاق بيروح على كان

وبيوصف حارته المصرية

يحكيلنا زمان وليالى زمان

عصر الفتوّنة والرجولية

وعشان ماهو عقله نجيب ونبيه

كل الحواديت جاتله لحده

واهى جايزة نوبل تحلف بيه

تشريف للفن اللى ف بلده

ما تقولوا ده مين؟

15

بيعيبوا عليه طُهره الكفار

فى ( سدوم) ملعون كل الأشرار

دى رجال تستغنى يا ناس برجال

ونساء تستغنى يا ناس بنساء

وما فيش لطريق الحق مجال

ما خلاص استشرى يا خلق الداء

ملاكين من عند الله جايين

بعذاب حيطول كل الملاعيين

ويحاولوا عشان يتعدّوا عليه

فى ضيوفه لكن يقدروا على مين؟

نجاه الله من شر الناس

وأشر الناس صبحوا هالكين

مع أهله نبى الله فى النور

ومراته مع القوم الكافرين

طب يطلع مين؟

14

فى بلاد فارس كان أصله أمير

وقصور وخدم أشكال والوان

وما حسش إن العز دا خير

ساب كله وراه وهام بلا عنوان

يبحث عن فين الخير يلاقيه

القلب عمار والنور فى عينيه

مليون مشوار حافى ح يمشيه

واللى حيهديه.. نور الرحمن

خد كل كتاب قدامه لقاه

إنجيل من بعده كمان توراه

والمولى يشاء ورسول الله

يظهر ويأمن بالقرأن

كان صاحب فكرة خندقهم

لما الكفار جت تحاصرهم

والنصر بفضل الله جالهم

الشكر على النور والإيمان

قال عنه النبى . من أل البيت

ودا أعظم شئ خده بالتأكيد

تكريم وياريتنا مكانه يا ريت

أصحاب لحبيب رب الإسلام

النور ده لمين؟

13

حبة سكات واسمعوا منى

حكاية الواد المفتون

عاشق وعشقه مجننى

أصبح مثل ولحد اليوم

عاشق يا ليلى وعشقه شروق

جبل التوباذ يشهد ع الشوق

ولا فيش فى وسط الناس مخلوق

يعشق وعينه تشوف النوم

يا ليلى ياللى غرامك كان

بيخلى رمل الصحرا حنون

يكتب فى إسمك ألف ديوان !!

ما يكفيهوش ولا ميت مليون

إزاى قدرتى تروحى بعيد

وتسيبى قلبه وحيد وشريد

الخلق تبقى يا ليلى ف عيد

وهو واحده يموت مجنون

العاشق مين ؟

12

من بعد جهل سنين

النور دخل دارهم

أمنت بدين ربنا

زاد الإيمان نورهم

ياسر دا كان جوزها

وإبنها عمّار

إتحملت تعذيب

وألام من الكفار

كل الرسول ما يفوت

يدعيلها بالجنة

صبرت على المكتوب

تدعى وتتمنى

كان الألم بيزيد

والجسم كله جروح

لكن عشان الدين

ضحت كمان بالروح

كتب التاريخ إسمها

بالنور فى كل مكان

أول شهيدة تروح

وتموت فدا الإسلام

قولولى تطلع مين؟

11

ملعون فى الأرض وكان جبار

وبكُفره بيتحدى القهار

ويقول أنا بس اله الكون

ويحط خليل الله فى النار

والمولى بفضله كريم ورحيم

بينجى خليله من الظالمين

أيام والنار بتزيد وتزيد

وخليله بيطلع منها سليم

ويسلّط أصغر حشرة عليه

تدخله فى راسه وما تخليه

يعرف فى الدنيا مكان يداويه

ويلاقى حياته دمار فى دمار

الكافر مين؟

10

قال ارقصى.....

قالتله حرقص عندما

تقطعلى راس يحيى النبى

وتجيبها قدامى هنا

الفتنة بدأت وقتها

صارت كما النار فى الحطب

وعشان جمالها وسحرها

نفّذ لها نفس الطلب

قتل النبى.....!!!

والراس على صينية دهب

كان مهرها

لكنها......

جريت على الراس الشريف

تحضنها والدمع إنطلق

كما نهر فاض.. جى من بعيد

لكن خلاص.....

اللى انكتب نافذ أكيد

ولا عمر دمع الكون يفيد

قتلوا النبى

قتلوا النبى

قتلوا النبى

من إمتى كان دمع الفجور

ياخلق.... بيرّجع شهيد؟

ملعونة.. لكن تبقى مين؟

9

يسألوا عن مين!.. عن عبد الله؟

المولى بخيره وفضله عطاه

بيخلّص ناس من شر الناس

بحديد ونحاس السد بناه

يأجوج مأجوج طاغيين ظالمين

والناس بتنادى تقول يا مُعين

وقالولوا بأُجرة ما بين جبلين

تبنيلنا جدار وتزيد فى عُلاه

قام رد وقال الخير بالخير

والمولى عطانى بفضله كتير

ساعدونى بجد بدون تقصير

ساعدوه وبناه والخير ويّاه

طب يطلع مين؟

8

أفرس نساء الكون

متجوّزة فرعون

جابوا الوليد م اليم

قالتله نور لعيون

فرعون رفض لكن

فى قلبها ساكن

الحُب من مولاه

جوه القلوب مركون

واما الرسالة تجيه

فرحت وأمنت بيه

فى الجنة ليها مكان

من رب كُن فيكون

قولولى تطلع مين؟

7

مليون تحية وألف سلام

لبطلنا فى الحلقة الليلة

ظلمه التاريخ وما قالش كلام

مع إنه له قصة طويلة

فارس وكان عاشق يا بلاد

وحكمها بعد الغورى ما مات

صديق لأهل النيل بالذات

وكأنه وياهم عيلة

الترك دخلوا بلاد النيل

وهو رافض أى دخيل

بس الزمن على قلبه بخيل

والعجز كان قلة حيلة

حارب بقلبه شهور وايام

وعدوّه يرفع إيده سلام

عاشق وكان أخرته إعدام

على بابها مشنوق يا زويلة

طب يطلع مين؟

6

نص حسن الدنيا عنده

غير كمان قلبه النضيف

لما كل الدنيا جاعت

قلبه كان للكون رغيف

رغم ان الكل حاربه

وانطعن منهم فى قلبه

برضه لم اخواته جنبه

والسماح طبع العفيف

(الصواع ) لما جابوه

حجة يحجز بيها اخوه

واما يسأل عنه ابوه

يفتكر ابنه الضعيف

القميص كان احلى أية

قصة خالدة للنهاية

يبقى مين قولوا معايا

الشريف ابن الشريف

ابن الشريف ابن الشريف

5

فزورة سهلة وبتشاور

على عبقرى وف دماغه حاجات

عقله الكبير دايما قادر

يملالنا أيامنا اختراعات

ألف اختراع.. يمكن أكتر

أهمهم... لمبة بيتنا

ندوس على الزر تنوّر

وتجيب نهار يملا حياتنا

أظن مش محتاج تفسير

وضحت لحضراتكوا الصورة

عشان كده الإسم ثنائى

راح يبقى حل الفزورة

العبقرى مين؟

.................

4

المؤمنين قلة

والإضطهاد ملعون

كان الطوفان علة

لجل اللى كان ما يكون

فى الصحرا وسفينته

يبنيها وبجهده

والخلق بتعانده

ويقولوا شيخ مجنون

قرّب ميعاد الله

والكل مستنيه

إبنه الكبير يعصاه

فكّر جبل يحميه

ملعون من الملاعين

واهو ضاع مع الضايعيين

مين يهدى ناس ظالمين

يتحدّوا رب الكون؟

لفت سفينته بلاد

عدت بحار وبحار

بعت الغراب ولا عاد

ولا جاب معاه أخبار

بعت الحمامة تطير

طارت كتير وكتير

رجعت ببشرة خير

منقارها غصن زتون

العدل شرع الله

جوه السفينة حماه

ع الجودى كان مرساه

من غير شكوك وظنون

يبقى النبى ده مين؟

3

الله على أحلى إيمان الله

فى الصحرا وبالأحضان وخداه

والسعى مابين جبلين إتنين

والطفل يزيد فى الحر بُكاه

بإيمانها تلف بسعى كبير

والمولى كريم وعظيم وقدير

ترجع للطفل تلاقى البير

تشرب ويكون فى مكانها حياه

والناس من كل مكان بتزور

وتلف على البيت المعمور

وبتسعى مابين جبلينها ف نور

بتقلد أم ذبيح الله

طب تطلع مين؟

2

من أرض النور والخير والدين

وبطلنا العاجز ف الرجلين

بإيمانه يحارب ف الظالمين

والقلب برغم العجز حديد

الغل ف قلب قلوبهم نار

والرعب ف قلب قلوبهم نار

وبطلنا بيتحدّى الأخطار

بإيمان والعقل عنيد وشديد

دا زعيم لحماس ضد الطغيان

ولا خاف صواريخ ولا هاب طيران

كان كل مُناه صد العدوان

ويموت على باب الأقصى شهيد

كان كل هدفهم لو يجيبوه

ويطفّوا الغل ويعتقلوه

أحدث طيران ضده وقتلوه

الشيخ على كرسى العجز قعيد

طب يطلع مين؟

الحلقة الاولى

الحلقة الاولى

لما كان قاعد لواحده

الاله ما سابوش وساعده

جابله اجمل حاجة عنده

حاجه منه

هى بنته وهى أمه

وهى كل الدنيا عنده

غلطة واحدة وكات كفاية

تنقلب كل الحكاية

تبقى خيط أول بداية

لجل نملا الدنيا بعده

يبقى مين؟

الشاطر فعلا حيفكر ويقولنا مين // مقدمة فوازير رمضان

30شخصية في حوايثنا

من بين ملايين

الشاطر منكم حّيفكر

ويقلنا مين

حدوتة تسلّم حدوتة

زي السبحات المربوطة

وف أخر ليلة ف شهر كريم

حوايتنا حتوصل للتوتة

ومعانا الكل أكيد فايز

فماحدش يستنى جوايز

ولايجي ف يوم ويقول عايز

حنكفّي الخلق دا كله منين ؟؟

30 شخصية لكن هىّ

من بين ملايين

والشاطر فعلا حيفكر ويقلنا مين ؟؟